ایلیاسین ناغیلی
ایلیاسین ناغیلی
بادی-بادی گیریفتار, حامام-حامام ایچینده, خلبیر سامان ایچینده,
دوه دللکلیک ائدر, کؤهنه حامام ایچینده. قارێشقا شێللاق آتدێ, دوهنین
قێچێ سێندێ. حامامچێنێن تاسێ یوْخ, بالتاچێنێن بالتاسێ یوْخ, اوْردا بیر تازێ
گؤردۆم, اوْنۇن دا خالتاسێ یوْخ. گۆنلرین بیر گۆنۆنده, مممد نسیر
تینینده. چوْخلۇ شیلاشێ یئمیشم, بئله یالان دئممیشم. بیری وار ایدی, بیری
یوْخ ایدی, اللهدان باشقا هئچ کیم یوْخ ایدی. بیر تاجیر وار ایدی. بۇ تاجیرین
ایلیاس آدلێ بیر قۇلۇ وار ایدی. تاجیر ایلیاسێ اؤز اوْغلۇ کیمی ایستییردی. ایلیاس دا
تاجیری اؤز ددهسی کیمی.
بیر گۆن تاجیر الینده اوْلان وار-یوْخ مایاسێنێ باتێردێ. تاجیر چوْخ
فیکیرلی-فیکیرلی اوْتۇرمۇشدۇ. ایلیاس بۇنۇ قۆسسهلی گؤرۆب یانێنا گلدی, دئدی:
- آغا, نه فیکیر ائلییرسن? دردینی دئ, بلکه چاره ائلدیم.
تاجیر گۆلۆب دئدی:
-آی ایلیاس, سن بیر قۇل آدامسان, منیم دردیمه نه چاره ائلیه
بیلرسن?
ایلیاس دئدی:
- آی آغا, سن اؤزۆن بیلیرسن کی, من سنی نه قدر ایستییرم. بلکه
ایکیمیز بیر یئرده دردۆوه درمان ائلدیک.
تاجیرین چارهسی کسیلدی, دئدی:
- ایلیاس, من وار-یوْخ مایامێ باتێرمێشام. ایندی الیمده بیر قپیک
مایام یوْخدۇ. اوْنۇن فیکرینی ائلییرم کی, ایندی من نه ائلیهجهیم.
ایلیاس دئدی:
- آغا, بۇننان هاسان شئی یوْخدۇ, آپار منی سات, همین پۇلۇ الینده
مایا ائله!
تاجیر گۆلۆب دئدی:
- ایلیاس اول, من سنی چوْخ ایستییرم. نئجه سنی آپارێم ساتێم? بیر
ده کی, سنه نه پۇل وئرهجکلر کی, من اوْنۇ الیمده مایا ائلییم?
ایلیاس دئدی:
- آغا, من قییمتلی قۇلام. من دۆنیادا اۆچ شئیی یاخشێ تانێیێرام.
آتێ, داش-قاشێ, آدامێ. اوْدۇ کی, آپار منی بازارا, بئش یۆز تۆمندن
آشاغێ ساتما. همین پۇلۇ گتیر, الینده مایا ائله!
تاجیر بیر آز فیکیر ائلدی, گؤردۆ باشقا چاره یوْخدۇ. ایلیاسێ قۇل میدانێنا
آپاردێ. کیم گلیب قییمت سوْرۇشۇردۇ, تاجیر بئش یۆز تۆمن دئییب,
اؤزۆ ده اۆچ شئی بیلدییینی خبر وئریردی.
بۇ واخت پادشاهێن وزیری بۇرادان کئچیردی. بۇ سسی ائشیدیب تاجیرین
یانێنا گلدی, دئدی:
- قۇلۇ نئچه دئییرسن?
- بئش یۆز تۆمنه دئییرم. اؤزۆ ده اۆچ شئیی یاخشێ تانێیێر: آدامێ, آتێ,
داش-قاشێ.
وزیر دئدی:
- سن دلی اوْلمۇسان ندی? هئچ پادشاهێن بۆتۆن قۇللارێ بئش یۆز
تۆمنه دیمز. سن بۇ قۇلۇ بئش یۆز تۆمنه دئییرسن?
تاجیر دئدی:
- بۇ قۇلۇن قییمتی هله بئش یۆزدن ده یۇخارێدێ. کئفین چکیر آل,
کئفین چکمیر آلما.
وزیر گئدیب پادشاها اهوالاتێ دانێشدێ. پادشاه دئدی:
- گئت, همین قۇلۇ آل!
وزیر بئش یۆز تۆمن گتیریب تاجیره وئردی, ایلیاسێ آلدێ, گتیریب پادشاهێن
قۇللارێنێن ایچینه اؤتۆردۆ.
تاجیر ده همین پۇلۇ الینده مایا ائلییب آلێش-وئریشینه باشلادێ.
تاجیر آلێش-وئریشینده اوْلسۇن, ایلیاس دا قۇللارێن ایچینده اوْلسۇن, سنه
کیمدن دئییم, بیزیم بۇ شهرین جاوان پادشاهێندان. بیر گۆن پادشاها
بیر گؤزل آت گتیردیلر. هامێ آتا باخێب به-به دئدی, هئچ کیم بیر ائییب
تاپمادێ. بیردن پادشاهێن یادێنا دۆشدۆ کی. آخێ منیم بیر قۇلۇم وار,
آتێ چوْخ یاخشێ تانێیێر. تئز امر ائلدی ایلیاسێ گتیردیلر. پادشاه دئدی:
- ایلیاس, بۇ آت نئجه آتدێ?
ایلیاس باش اییب دئدی:
- قیبلئیی-عالم ساغ اوْلسۇن, بۇ آتا هئچ بیر سؤز یوْخدۇ. آت بیرینجی آتدێ.
اما بۇنۇن بیر ائیبی وار کی, سۇیا گیرسه یاتار.
هامێ دئدی:
- هئچ ائله شئی اوْلماز.
ایلیاس دئدی:
- پادشاه ساغ اوْلسۇن, منیم دؤولتیم یوْخدۇ, آنجاق باشێمێ گیروْو
قوْیارام. آتێ سالاق سۇیا, اگر یاتماسا منیم بوْینۇمۇ وۇرۇن!
بلی, آتێ میندیلر, سۇیا وۇردۇلار. آت سۇیا گیرن کیمی یاتدێ. هامێ
متتل قالدێ.
پادشاه ایلیاسدان سوْرۇشدۇ:
- ایلیاس, بۇ آت نییه سۇیا گیرن کیمی یاتدێ?
ایلیاس دئدی:
- پادشاه ساغ اوْلسۇن, بۇ آتا جامێش سۆدۆ وئریبلر, اوْدۇ کی, جامێش کیمی
سۇیا گیرن کیمی یاتدێ.
پادشاه ایلیاسێن بۇ سؤزۆنۆ یوْخلاماق اۆچۆن آتێ ساتاندان سوْرۇشدۇ:
- سن بۇ آتا جامێش سۆدۆ وئرمیسن?
آت ساتان باش اییب دئدی:
- پادشاه ساغ اوْلسۇن, بۇ آت آنادان اوْلاندان سوْنرا آناسێ اؤلدۆ, من ده
اوْنۇ جامێشێمێزا عمیزدیردیم.
پادشاهێن ایلیاسدان چوْخ-چوْخ خوْشۇ گلدی, دئدی:
- بۇ آتێ آلێن, ایلخێیا قاتێن! چاپێشمادا لازێم اوْلار.
اؤزۆ ده امر ائلدی کی, بۇندان سوْنرا من یئین خؤرکدن ایلیاسا دا
وئرین!
بلی, ایلیاس هر گۆن پادشاه یئین خؤرکدن یئییردی. بۇنلار بۇرادا
یئمکده اوْلسۇنلار, سنه کیمدن دئییم بیزیم پادشاهێن قوْناقلارێندان.
بیر نئچه شهرلرین پادشاهلارێ بیزیم پادشاها قوْناق گلمیشدیلر.
بیر نفر ده پادشاها یۇمۇرتا بوْیدا آلماز گتیرمیشدی. هامێ آلمازا
باخێب به-به ائلییب دئییردی: بۇ آلمازێن هئچ قییمتی یوْخدۇ. بۇ
قییمتده شئی اوْلا بیلمز.
بیردن پادشاهێن یادێنا دۆشدۆ کی, آخێ منیم ایلیاس آدێندا قۇلۇم
وار, داش-قاشێ یاخشێ تانێیێر. تئز امر ائیلهدی ایلیاسێ چاغێرتدێردێ. ایلیاس گلدی
باش ایدی, دایاندێ.
پادشاه دئدی:
- ایلیاس, اوْغۇل, بۇ آلمازا قییمت قوْی!
ایلیاس آلمازێ آلدێ الینه, بیر اوْ طرفینه باخدێ, بیر بۇ طرفینه باخدێ, دئدی:
- پادشاه ساغ اوْلسۇن, بۇ آلماز اوْتۇز تۆمندن یۇخارێ دیمز, چۆنکی
بۇنۇن اۆزۆ آلمازدێ, ایچی توْرپاقدێ.
هامێ دئدی:
- هئچ ائله شئی اوْلا بیلمز.
ایلیاس دئدی:
- پادشاه ساغ اوْلسۇن, امر ائلیین آلمازێ سێندێرسێنلار, ایچیندن توْرپاق
چێخماسا بوْینۇمۇ وۇردۇرۇن.
بلی, پادشاه امر ائلدی, آلمازێ سێندێردێلار. آلماز سێنان کیمی ایچیندن
توْرپاق تؤکۆلدۆ. همین آلمازا قییمت قوْیانلار کی, دئییردیلر بۇ
آلمازێن قییمتی یوْخدۇ, هامێ اۇتاندێ, باشێنێ آشاغێ سالدێ. پادشاه فرحلندی
کی, بئله بیر قۇلۇ وار. قوْناقلارێن یانێندا قوْلتۇغۇ شیشدی. بلی, پادشاه
امر ائلدی کی, بۇندان سوْنرا ایلیاس منیم اؤزۆمله چؤرک یئیهجک.
بلی, بۇ گۆندن ایلیاسنان پادشاه همیشه بیر یئرده چؤرک یئییردیلر.
بۇنلار بۇردا یئمکده اوْلسۇن, ایچمکده اوْلسۇن, سنه کیمدن دئییم,
بۇ شهرده گؤزللیکده میثلی-برابری اوْلمایان بیر قێز واردێ. بۇ قێزێن
گؤزللییی بۆتۆن شهرده مشهۇردۇ. اما بۇ قێزێ هئچ کیم گؤرممیشدی,
آنجاق آدێنێ ائشیتمیشدی. بیر گۆن پادشاه فیکیرلشدی کی, بیر اؤزۆنۆ بۇ
قێزێن یانێنا وئرسین. چوْخ فیکیرلشدی, آخێردا بئله تاپدێ کی, امر ائلسین هئچ
کیم شهره چێخماسێن, اؤزۆ خلوتجه قێزێن یانێنا گئتسین. بلی, بیر گۆن
پادشاه امر ائلدی کی, آخشام ساعت سککیزدن سوْنرا بیر آدام ائشیکده قالماسێن,
بیر آدامێن حاقۇشقالارێ آچێق اوْلماسێن. امرینه تابع اوْلمایانلارێن
باشێنێ بدنیندن آیێراجام.
بلی, ائله کی, آخشام سککیز اوْلدۇ, ممه یئیندن پپه یئینه کیمی
هامێ قوْرخۇدان گیزلندی. ائله کی, بیر آز دا کئچدی, پادشاه یاواش-یاواش
ائودن چێخێب همین گؤزلگیله طرف گئتمهیه باشلادێ. بلی, پادشاه گلیب
قێزێن قاپێسێنێ دؤیدۆ, قۇللۇقچۇ گلدی.
پادشاه دئدی:
- گئت, خانێما دئ کی, پادشاه گلیب.
قۇللۇقچۇ گلیب خانێما دئدی.
خانێم دئدی:
- گئت, پادشاها دئ کی, بیر اینییم وار, نه آرێقدێ, نه کؤک, اؤلدۆرسن نه
قدر پییی چێخار?
قۇللۇقچۇ گلیب خانێمێن دئدییینی پادشاها دئدی.
پادشاه بیر آز فیکیرلشدی, آخێردا دئدی:
- گئت, خانێما دئ کی, دؤرد پۇد.
قۇللۇقچۇ گئدیب خانێما دئدی.
خانێم دئدی:
- گئت, دئنن خوْش گلدی, گئده بیلر.
ائله پادشاه ایستییردی قایێتسێن, گؤردۆ کی, بیر قارالتێ گلیر. اؤز-اؤزۆنه
دئدی: بۇ کیمدی منیم امریمدن چێخێب شهرده گزیر. یاخشێ, من صاباح
آتاسێنێ یاندێرارام, قوْی یاخێنلاشسێن گؤرۆم کیمدی.
قارالتێ یاخێنلاشدێ. پادشاه گؤردۆ کی, اؤز وزیریدیر. تئز گیزلندی
اوْرادا اوْلان آغاجلارێن دالێندا. دئدی, قوْی گؤرۆم وزیر نه قایێراجاق.
وزیر پادشاهێ گؤرمۆردۆ, اما پادشاه اوْنۇ گؤرۆردۆ. وزیر قێزێن قاپێسێنا
یئتیشدی, قاپێنێ دؤیدۆ, قۇللۇقچۇ گلدی, وزیر دئدی:
- گئت, خانێما دئ کی, وزیر گلیب.
قۇللۇقچۇ گئتدی خانێما دئدی... قایێدێب گلدی کی:
- خانێم دئییر کی, بیر اینییم وار, نه آرێقدێ, نه کؤک, اؤلدۆرسم نه
قدر پییی چێخار?
وزیر فیکیرلشدی نه دئسین. نئچه پۇد دئسین. آخێردا دئدی:
- یئددی پۇد.
قۇللۇقچۇ گئدیب خانێما خبر وئردی, گلیب دئدی:
- خانێم دئییر کی, گئده بیلر, خوْش گلدی.
وزیر ایستییردی قایێتسێن, بیر ده گؤردۆ کی, آها بۇدۇ, بیر قارالتێ گلیر.
اؤز-اؤزۆنه دئدی: اده, بۇ کیمدی ائشییه چێخێب. سحر پادشاها دئیهجهیم
بۇنۇن باشێنێ بدنیندن آیێرسێن. تئز آغاجلارێن دالێنا گیردی کی, گیزلنسین,
گؤردۆ پادشاه دا بۇرادادێر. وزیر ایستهدی سس ائلسین, پادشاه دئدی:
- دینمه, گؤرک بۇ گلن کیمدی. گؤرک بۇ نه دئیهجک.
بۇنلار بۇرادا مێسدێلار. قارالتێ یاخێنلاشدێ, گؤردۆلر کی, بۇ گلن
ایلیاسدێ. ایلیاس قێزێن قاپێسێنێ دؤیدۆ, قۇللۇقچۇ گلدی, ایلیاس دئدی:
- گئت, خانێما دئ کی, پادشاهێن قۇلۇ ایلیاس گلیب.
قۇللۇقچۇ گئدیب خانێما خبر وئردی, گلیب ایلیاسا دئدی:
- خانێم دئییر کی, بیر اینییم وار, نه آرێقدێ, نه کؤک; اؤلدۆرسم نه
قدر پییی چێخار?
پادشاهنان وزیر دئدیلر, دایان گؤرک ایندی بۇ نه دئیهجک.
ایلیاس دئدی:
- گئت, خانێما دئ کی, قبۇلدۇ.
پادشاهنان وزیر لاپ متتل قالدێلار, دئدیلر نه اوْلسۇن کی, بۇنۇ بیز
ده دئیردیک ده.
بلی, قۇللۇقچۇ گلیب قاپێنێ آچدێ. ایلیاس ایچری گیردی. پادشاهنان وزیر
ایشی بئله گؤرۆب تئز بیر تهر اؤزلرینی قێزێن باغچاسێنا سالدێلار, آغاجلارێن
آلتێندا گیزلندیلر. گؤردۆلر کی, ایلیاس گلیب ائیواندا ایلشیب.
بلی, قۇللۇقچۇ الینده بیر پوْدنوْس, اۆستۆنده آغ اؤرتۆک, گتیریب ایلیاسێن
قاباغێنا قوْیدۇ. ایلیاس پوْدنوْسدان اؤرتۆیۆ گؤتۆردۆ, گؤردۆ کی, پوْدنوْسدا
بیر قایچێ, بیر واراق کاغێذ, بیر قۇران, بیر توْپ ایینه, بیر ده بیر نار وار.
پادشاهنان وزیر دئدیلر, هله قوْیاق کی بیز ده دئمیشیک “قبۇلدۇ”,
یاخشێ, بس بۇ نه اوْلسۇن. نار, قۇران, ایینه, قایچێ, ایندی کی, بۇ سیرری بیلمهیهجکدیک.
قوْی گؤرک ایلیاس نئیلهیهجک.
ایلیاس ایینهلری گؤتۆرۆب هامێسێنێ بیر-بیر نارێن اۆستۆنه تاخدێ. سوْنرا
کاغێذێ گؤتۆرۆب قایچێ ایله جێققێلێ-جێققێلێ دوْغرادێ. سوْنرا قۇرانێ اؤپۆب
یئره قوْیدۇ. پادشاهلا وزیر بیر-بیرینه دئدیلر:
- یاخشێ, بۇ نه اوْلسۇن?
بۇ حالدا قۇللۇقچۇ گلدی, پوْدنوْسۇ آپاردێ. بلی, ائله کی, قۇللۇقچۇ
پوْدنوْسۇ آپاردێ, خانێم ائیوانا گلدی. قوْلۇنۇ ایلیاسێن قوْلۇنا سالدێ.
خانێم نه خانێم... آیا, گۆنه دئییر سن چێخما, من چێخاجاغام. آدام
دئییر یئمهییم, ایچمهییم, بۇ خانێمێن خطتی-خالێنا, گۆل جامالێنا تاماشا
ائلییم. پادشاهلا وزیرین آغزێنێن سۇیۇ آخێردێ. خانێملا ایلیاس اؤپۆشدۆلر,
گؤرۆشدۆلر, سوْنرا گیردیلر ائوه. وزیرله پادشاهێن آز قالێردێ پاخێللێقدان
باغێرلارێ چاتلاسێن.
بلی, پادشاهگیل گؤردۆلر کی, آز قالێب صۆبح آچێلسێن, تئز دۇرۇب ائولرینه
گئتدیلر.
ایلیاس سحر چوْخ بیواخت ائوه گلدی. پادشاه دئدی:
- ایلیاس, گئجه هارادایدێن?
ایلیاس دئدی:
- پادشاه ساغ اوْلسۇن, منی سنه ساتان تاجیرین آناسێنێ من اؤزۆمه آنا
کیمی بیلردیم. اوْ دا منی چوْخ ایستییردی. اوْ اؤلۆبدۆ, گئتمیشدیم اوْنۇن
قبرینین اۆستۆنه. قبرین اۆستۆنده آغلادێم, آغلادێم, یۇخۇ تۇتدۇ, قالدێم
قبرین اۆستۆنده. بیر ده گؤردۆم کی, سحردی.
پادشاه بیلیردی کی, گئجه ایلیاس هارادایدێ, چۆنکی اؤزۆ اؤز گؤزۆ ایله
گؤرمۆشدۆر. اوْدۇ کی, بیلدی کی, ایلیاس یالان دئییر, یئنه دئدی:
- ایلیاس, دۆزۆن دئ, گئجه هارادایدێن?
ایلیاس دئدی:
- پادشاه ساغ اوْلسۇن, یۇخۇ تۇتمۇشدۇ, قالمێشدێم قبرین اۆستۆنده.
پادشاه حیرصلندی, دئدی:
- ایلیاس, دۆزۆنۆ دئ, گئجه هارادایدێن? یوْخسا باشۇوۇ بدنیندن
آیێرارام.
ایلیاس یئنه دئدی:
- پادشاه ساغ اوْلسۇن, یۇخۇ تۇتمۇشدۇ, قالمێشدێم قبرین اۆستۆنده.
القرز, پادشاه نه قدر دئدیسه ائله ایلیاس دئدی:
- پادشاه ساغ اوْلسۇن, یۇخۇ تۇتمۇشدۇ, قالمێشدێم قبرین اۆستۆنده.
پادشاه امر ائلدی کی:
- آپارێن, بۇ ملۇنۇ اوْخلایێن.
اما اوْخ آتانلارێ اؤیرتدی کی, اوْخۇ ائله آتسێنلار ایلیاسا دیمهسین.
چۆنکی بۇ سیرلری اؤیرنمک ایستییردی.
بلی, ایلیاسێ اوْخا باسدێلار. اما اوْخ ایلیاسا دیمیردی, بوْینۇنۇن,
قوْلتۇغۇنۇن آلتێندان کئچیردی. پادشاه گلدی, دئدی:
- ایلیاس, دۆزۆن دئ گؤرۆم, گئجه هارادایدێن? یوْخسا بۇ ساعت سنی
آسدێرارام.
ایلیاس یئنه دئدی:
- پادشاه ساغ اوْلسۇن, یۇخۇ تۇتمۇشدۇ, قالمێشدێم قبرین اۆستۆنده.
پادشاهێن غضبی آرتدێ. حیرص بئینینه وۇردۇ, گؤردۆ کی, بۇ دئدییین
دئییر, امر ائلدی:
- بۇ ساعت بۇنۇ آسێن!
بلی, ایلیاسێ دار آغاجێنێن آلتێنا گتیردیلر. کندیری بوْغازێنا سالدێلار.
ائله کی, ایستهدیلر کندیری چکسینلر, بیر ده گؤردۆلر کی, بیر آتلێ چاپا-چاپا
گلیر. آتلێ ائله یئیین گلیردی کی, آتێن اۆستۆندهکینی گؤرمک مۆمکۆن دئییلدی.
ائله کی, دار آغاجێنێن آلتێنا یئتیشدی, چاپا-چاپا یئره بیر نار وۇرۇب
گئتدی. نار داغێلدێ.
ایلیاس دئدی:
- دایانێن دئییم.
بلی, ایلیاسێن بوْینۇندان کندیری آچدێلار.
ایلیاس دئدی:
- پادشاه ساغ اوْلسۇن, گئدک اوْتاغا, بۇ سیرری تک سنه دئیهجهیم.
پادشاهلا ایلیاس گئتدیلر اوْتاغا. ایلیاس دئدی:
- پادشاه ساغ اوْلسۇن, گئجه من فیلان گؤزل قێزێن یانێندا ایدیم.
پادشاه دئدی:
- یاخشێ, اوْ پیی مسئلهسی نه ایدی کی, سن دئدین قبۇلدۇ.
ایلیاس دئدی:
- پادشاه ساغ اوْلسۇن, خانێم اوْ سۇالنان دئمک ایستییردی کی, سن منی
گؤرممیسن, بیلمیرسن آرێغام, کؤکم, گؤزلم, چیرکینم. اوْندا من
دئدیم کی, قبۇلدۇ. یعنی هر نئجه اوْلسان, گؤزل ده, چیرکین ده, کؤک ده
منه قبۇلسان. اوْندا قاپێنێ آچدێلار, منی ایچری بۇراخدێلار.
پادشاه دئدی:
- یاخشێ, اوْ پوْدنوْس مسئلهسی نه ایدی?
ایلیاس دئدی:
- پوْدنوْسداکێ ایینهلری نارێن اۆستۆنه وۇردۇم کی, یعنی بدنیمی بئله
اوْخلاسالار, یئنه بۇ سیرری هئچ کیمه دئمهیهجهیم. سوْنرا کاغێذێ قایچێینان
دوْغرادێم کی, بدنیمی بۇ کاغێذ کیمی دوْغراسالار دا, هئچ کیمه
بۇ سیرری آچمارام. سوْنرا قۇرانێ اؤپدۆم, یئره قوْیدۇم کی, آند اوْلسۇن بۇ
قۇرانا, هئچ کیمه هئچ نه دئمهرم. اوْدۇ کی, دئمیرم ده.
پادشاه دئدی:
- یاخشێ, بس نییه سیرری آچێب ایندی دئییرسن?
ایلیاس دئدی:
- پادشاه ساغ اوْلسۇن, اوْ آتلێ کی, کئچدی, نارێ وۇردۇ یئره, نار داغێلدێ,
همین قێزدێ. نارێ یئره وۇردۇ, دئدی کی, بۇ سیرر منیم دئییل قوْی داغێلسێن,
سن اؤلمه. اوْدۇ کی, من ده دئدیم.
پادشاه ایلیاسا په-په دئییب اؤز یانێندا اوْتۇرتدۇ, دئدی:
- ایلیاس, آخێ سن آدامێ دا تانێیێرسان. ایندی دئ, گؤرۆم من نئجه
آدامام?
ایلیاس دئدی:
- پادشاه ساغ اوْلسۇن, سن چؤرکچی اوْغلۇسان.
پادشاه دئدی:
- سن نه دانێشێرسان, من پادشاه اوْغلۇیام. منیم آتام دا بۇ
شهرین پادشاهێ اوْلۇب, بابام دا.
ایلیاس دئدی:
- پادشاه ساغ اوْلسۇن, امر ائله آنان گلسین, سوْرۇش, ائله اوْلماسا بوْینۇمۇ
وۇردۇر!
پادشاه آناسێنێ چاغێردێ, دئدی:
- آنا, دۆزۆنۆ دئ, من کیمین اوْغلۇیام? منیم آتام کیم اوْلۇب?
آناسێ دئدی:
- بالا, من سنه همله اوْلاندا آتان دئدی کی, اگر قێز دوْغسان, سنی
اؤلدۆرهجهیم, اوْغلان دوْغسان, نه دئسن گؤزۆم اۆسته. من دوْغان گئجهسی
قوْنشۇدا چؤرکچینین آروادێ دا دوْغدۇ. منیم قێزێم, اوْنۇن اوْغلۇ اوْلدۇ. ایشی
بئله گؤرنده مامایا پۇل وئردیک, چؤرکچییه ده پۇل وئردیک, اۇشاقلارێ
دییشدیردیک. ایندی سن, دوْغرۇدان دا, چؤرکچی اوْغلۇسان.
پادشاه ایلیاسا آفرین دئییب سوْرۇشدۇ:
- ایلیاس, سن نه بیلدین کی, من چؤرکچی اوْغلۇیام?
ایلیاس دئدی:
- پادشاه ساغ اوْلسۇن, من اوْندان بیلدیم کی, سن اول دفعه امر
ائلدین کی, سنین چؤرییندن وئرسینلر. سوْنرا دا بیر یئرده چؤرک یئدیک.
تا سن منه نه پۇل, نه باشقا شئی باغێشلامادێن. اوْدۇ کی, من بیلدیم
سن چؤرکچی اوْغلۇسان.
پادشاه دئدی:
- یاخشێ, ایلیاس, بس اوْ قێز کیمدی?
ایلیاس دئدی:
- پادشاه ساغ اوْلسۇن, اوْ قێز پادشاه قێزێدێ.
پادشاه آناسێندان سوْرۇشدۇ, گؤردۆ, دوْغرۇدان دا, همین قێز بۇنۇن
یئرینه دییشیلن قێزدێ. پادشاه سوْرۇشدۇ:
- ایلیاس, بس سن کیمسن?
ایلیاس دئدی:
- پادشاه ساغ اوْلسۇن, من بیر باغبان اوْغلۇیام. من اۇشاق اوْلاندا
بیزیم شهره هۆجۇم ائلییب باسێرلار, منی اسیر ائلییرلر, سوْنرا دا
گتیریب قۇل یئرینه ساتێرلار.
پادشاه ایلیاسێن بۆتۆن خاسیتینه فرحلندی. همین قێزێ ایلیاسا
آلدێ, قێرخ گۆن, قێرخ گئجه توْی ائلدی, اؤز تاجێنێ باشێندان گؤتۆرۆب ایلیاسێن
باشێنا قوْیدۇ, دئدی:
- پادشاهلێغا سن یارارسان. سنین بیلییین منیمکیندن چوْخدۇ.
بۇندان سوْنرا بۇ شهرین پادشاهێ ایلیاس اوْلدۇ.
یئدیلر, ایچدیلر, مطلبه یئتیشدیلر. گؤیدن اۆچ آلما دۆشدۆ. بیری
منیم, بیری ناغێل دئیهنین, بیری ده اؤزۆمۆن. سن یۆز یاشا, من ایکی اللی.
هانسێ چوْخدۇ سن گؤتۆر! سن ساغ, من سلامات.
میزه رشین كندی دوغو آذربایجان ایالتی نين اوشقایا بولگهسی نين مرکزی بولومو نده اولان گنبر قصبه سی نده يئرلشيب. 1390 اينجي ايلين نوفوس ساييسي اساسيندا بو كندين 1112 نفر اهاليسي وارايميش .